Lauda Sion salvatorem lauda ducem et

Lauda Sion salvatorem lauda ducem et pastorem in hymnis et canticis | Quantum potes tantum gaude quia major omni laude nec laudare sufficis | Laudis thema specialis panis vivus et vitalis hodie proponitur | Quem in sacrae mensa cenae turbae fratrum duodenae datum non ambigitur | Sit laus plena sit sonora sit jocunda sit decora mentis jubilatio | Dies enim sollemnis agitur in qua mensae prima recolitur hujus institutio | In hac mensa novi regis novum pascha novae legis phase vetus terminat | Vetustatem novitas umbram fugat veritas noctem lux illuminat | Quod in cena Christus gessit faciendum hoc expressit in sui memoriam | Docti sacris institutis panem vinum in salutis consecramus hostiam | Dogma datur christianis quod in carnem transit panis et vinum in sanguinem | Quod non capis quod non vides animosa affirmat fides praeter rerum ordinem | Sub diversis speciebus signis tantum et non rebus latent res eximiae | Caro cibus sanguis potus manet tamen Christus totus sub utraque specie | A sumente non concisus non confractus nec divisus integer accipitur | Sumit unus sumunt mille quantum isti tantum ille nec sumptus assumitur | Sumunt boni sumunt mali sorte tamen inaequali vitae vel interitus | Mors est malis vita bonis vide paris sumptionis quam sit dispar exitus | Fracto demon sacramento ne vacilles sed memento tantum esse sub fragmento quantum toto tegitur | Nulla rei fit scissura signi tantum fit fractura qua nec status nec statura signati minuitur | Ecce panis angelorum factus cibus viatorum vere panis filiorum non mittendus canibus | In figuris praesignatur cum Isaac immolatur agnus paschae deputatur datur manna patribus | Bone pastor panis vere Jesu nostri miserere tu nos pasce nos tuere tu nos bona fac videre in terra viventium | Tu qui cuncta scis et vales qui nos pascis hic mortales tu nos ibi commensales cohaeredes et sodales fac sanctorum civium amen